Aihotz plazan 2013-08-05

Bertso-saioak izango dira egunero Gasteizko jaietan

 Bere lekua hartzen ari da bertsoa Gasteizko jaietan. Aurten ere, urtero bezala, egunero bertso-saioak izango dira Aihotz plazan eguerdiko 13:30etan. Gaur, Josu Goikoetxea gai-jartzaile dutela, Igor Elortza eta Jon Maia ariko dira kantuan.

 Bihar laukotea aterako da oholtzara: Julio Soto, Ruben Sanchez, Andoni Egaña eta Orlando Arreitunandia. Unai Gomezek aurkeztuko du saioa.

 Etzi, Beñat Garaio gidari dutela, Zigor Enbeita, Sebastian Lizaso, Erika Lagoma eta Onintza Enbeita jardungo dira kantuan.

 Hilaren 8an Jon Uria, Arkaitz Estiballes, Amets Arzallus, Felipe Zelaieta eta Paula Amilburu dira kantatzekoak Marta Ugarteren esanetara.

 Hilaren 9an, berriz, bi saio daude iragarrita. 12:30etan haur eta gaztentzako "Bikokote" emanaldi berezia izango da Ama Birjin Zuriaren plazan. Ondoren, eguerdiko 13:30etan, Aihotz plazan eguneroko saioa izango da. Manex Agirre, Sustrai Colina, Maialen Lujanbio eta Alaia Martin jardungo dira kantari. Gai-jartzaile lanetan, berriz, Olatz Bayer ariko da.

• 
•