Urte askoan plazetan aritua 2013-08-10

Kosme Lizaso bertsolaria hil da

 Bertsolari ezagun eta maitatua zen Kosme Lizaso. Atzo hil zen gaixotasun luze baten ondoren. 1937an jaio eta 50eko hamarkadan hasi zen bat-bateko jardunean. Hasieran inguruko bertsolariekin aritu zen, Jose Joakin Mitxelenarekin eta Jose Luis Lekuona "Lexoti"-rekin bereziki. Ondoren, ordea, garaiko bertsolari ezagunenak izan zituen oholtzako kide eta urte askotako ibilbidea osatu zuen plazaz plaza. Tartean, txapelketetan ere nabarmendu zen eta Gipuzkoako Bertsolari Txapelketako finalista izan zen 1964an eta 1966-67koan.

 Aspaldian plazetatik urrundu xamar bazegoen ere, bazituen urtero kantura joaten zen saioak, Errenteriako Santa Ageda bezperako errondara esate baterako. Idatziz ere ondare oparoa utzi zuen. Gainera, Jose Joakin Mitxelenari buruzko "Jose Joakin Mitxelena gogoan" liburua ere idatzi zuen, Auspoa sailean argitaratua.

 Bere aldeko hileta elizkizunak gaur egingo dira, iluntzeko 19etan, Oiartzungo San Esteban parrokian.

• 
•