16 bertsolari gaztek hartuko dute parte 2013-08-28

Lizardi Sariko kanporaketak bihar eta etzi Zarautzen

Inazio Eizmendi Basarri bertsolariaren mendeurrenean hamasei bertsolari gazte arituko dira kantuan Zarautzen 37. Lizardi Sarian. Urteroko moduan, bi kanporaketa eta finala jokatuko dira. Zortzina bertsolariko bi kanporaketa jokatuta, seiko taldea pasako da finalera, kanporaketako bi irabazleak eta puntu gehien lorturiko beste lauak. Ostegunean honako zortzikote hau arituko da, Jon Zalduaren esanetara: Aimar Karrika, Eneritz Artetxe, Peio Ormazabal, Asier Azpiroz "Azpi", Odei Lopez, Gema Urteaga, Beñat Iguaran eta Eneritz Arzallus. Ostiralean, Maite Aizpuruaren esanetara: Ane Labaka, Saioa Alkaiza, Sabin Iraztorza, Alazne Untxalo, Amaia Iturriotz, Mikel Iturriotz, Oier Aizpurua eta Xabi Igoa. Saioak Urpekoak elkarteak izango dira, afalondoan.

Lau lan puntuagarri
Kanporaketan bertsolariek lau lan puntuagarri eta 11na bertso dituzte. Hiru lan ofiziotan, zortziko handian, zortziko txikian eta hamarreko txikian, eta bina punturi. Finalean, berriz, aurten aldaketa txiki bat izango da, hamarreko txikiaren ordez, sei puntuko lana izango baitute. Orotara, bost lan puntuagarri izango dira finalean: zortziko handia, zortziko txikia, bina puntu, sei puntukoa eta kartzela hiru bertso. Denera, 14 bertso puntuagarri. Iazko edizioan, Haritz Casabal izan zen txapeldun eta Unai Gaztelumendi bigarren.

• 
•