BAT txapelketa Etxarri-Aranatzen 2014-05-13

Beñat Gaztelumendi txapeldun

Jone Uriarekin buruz burukoa jokatuta jantzi zuen txapela Beñat Gaztelumendik. Egun osoko jaia egin zuten Etxarri-Aranatzen Euskal Herriko Bertso-Afari Txapelketaren bosgarren urteurrenean.

Bost urte dira Etxarri-Aranatzen Euskal Herriko Bertso Afari Txapelketa egiten dutela eta aurtengoa berezia izatea nahi zuten Karrikestu Elkarteko antolatzaileek. Orain artekoak ondo joan direla ospatu eta datorren urtean belaunaldi berriko bertsolariak gonbidatuko dituztelako sariketara.

Egun osoko egitaraua osatu zuten larunbaterako. Ekimenari Karrikestu elkartean eman zioten hasiera bazkariarekin. Hortik aurrera bertsoa eta bertsolariak protagonista. Hamazazpi bertsolari tabernaz taberna kantuan: Eneko Lazkoz, Saioa Alkaiza, Oier Lakuntza, Egoitz Gorosterrazu, Aimar Karrika, Beñat Gaztelumendi, Maddi Ane Txoperena, Arrate Illaro, Iñaki Viñaspre, Oier Arbina, Jone Uria, Xumai Murua, Julio Soto, Ander Solozabal, Eneritz Zabaleta, Odei Barroso eta Izar Mendiguren.

Tabernetako barren ondoan jokatutako kanporaketetan sailkatu ziren gaueko finalean abestuko zuten sei bertsolariak: Arrate Illaro, Oier Lakuntza, Jone Uria, Beñat Gaztelumendi, Julio Soto eta Eneko Lazkoz.

Gaztetxean jokatu zen finalean Joseba Beltza etxarriarrak egin zituen gai-jartzaile lanak. Hasierako agurren ondotik zortziko handian binaka abestu zuten bertsolariek eta zortziko txikian gero. Bakarka bina bertso abestu eta binaka "Iparragirreren doinuan" egin zituzten azken ofizioak finaleko lehen fasean.

Buruz burukora Jone Uria eta Beñat Gaztelumendi sailkatu ziren. Kartzelako ariketarekin hasi zen buruz burukoa eta gaiari bina bertso abestu zizkien Jone eta Beñatek. Librean kantari amaitu zuten saio puntuagarria.

Azkenean, Beñat Gaztelumendik irabazi zuen txapela. Sari-banaketaren ondoren festak goizalderarte jarraitu zuen gaztetxean