Irailaren 12ra bitarte 2014-06-12

Bertsolaritzari buruzko doktorego-tesia egiteko bigarren deialdia zabalik

 Mintzola Fundazioak, Mikel Laboa Katedrak eta EHUko Euskara Errektoreordetzak bertsolaritzaren inguruko doktorego-tesia egiteko bigarren kontratu-deialdia martxan jarri dute. Gaur egin da prentsaurrekoa Villabonako Subijana Etxean. Bertan izan dira Beñat Gaztelumendi (Bertsozale Elkarteko Ikerkuntza arduraduna), Juan Kruz Igerabide (Mikel Laboa katedrako zuzendaria) eta Xabier Etxaniz (EHUko Euskara Arloko Errektoreordea).

 Azaldu dutenez, urtebeteko doktorego aurreko kontratua da eskaintzen dena, ondo bidean hiru urtean luzatuko dena. Proiektuak irailaren 12a baino lehen aurkeztu beharko dira.

 Ikerketak bertsolaritzaren ingurukoa izan beharko du, eta edozein talaiatik begiratzeko aukera izango du ikerlariak. Bertsozale Elkarteak bultzatuta, 2011 eta 2012 urteen artean bertsolaritzaren inguruko ehun bertsozale, aditu eta eragile baino gehiago elkarrizketatu ziren Ikerketa Ekintza Parte Hartzailea izeneko metodoa erabiliz. Bertatik atera ziren bertsolaritzaren ikerlerroak eta ikergai lehenetsiak. Deialdi honetako epaimahaiak kontutan izango ditu horiek erabakia hartzerako orduan. Nahi izanez gero Mintzola.com atarian kontsultagarri daude ikergai lehenetsiak.

 Iaz Miren Artetxek

 Aurtengoa deialdiaren bigarren edizioa izango da. Iazkoan Miren Artetxek jaso zuen kontratua, eta honako ikerketa hau egiten ari da egun: "Bertsolaritzaren transmisioa eta euskararen gune sinbolikoaren sendotzea. Ipar Euskal Herriko gazteen hizkuntz identitate eta portaerak".

• 
•