Lesakako jaialdia 2014-07-22

Zapi gorriz jantzitako bertsoak

Lesakan Ezpatadantzarien emanaldia izaten da uztailaren 7-ko ekimen nagusia eta Plaza Zaharra herritar eta bisitariz bete ohi da Mutil-dantza, Neska-dantza, Aurresku eta Jotak ikusteko.

Horren jarraian  hasten da hitzen dantza. "Bi nafar eta BEC-eko podiuma", horrela aurkeztu zuen Iban Garro gai-jartzaileak oholtzara igo zen boskotea. Eneko Fernandez eta Erika Lagoma nafarrak eta Amets Arzallus, Maialen Lujanbio eta Igor Elortza BEC-eko "podium-tarrak".

Lehenengo aldiz kiosko aurreko hesia kenduta bertsolariak eta entzuleak plaza berean eta oso-osorik. Elkarren bistara, elkarrengandik gertuago... eskertzekoa aldaketa. 

Iban Garro lesakarra aritu zen gai-emaile lanetan bertako bertso-eskolako kideek jarritako gaiak aurkezten. Gaiak umoretik eta zorroztasunetik jarriak. Ohi bezala, bakarkako lanak serioagoak izan ziren ofizioak baino. Dena den, binaka kantatzeko jarritako gaiek ere bazuten nondik sakondu.

Ofizio aipagarrienetako bat Igor eta Enekok osatutakoa. "Enpresa berean lanean aritutako langilea eta enkargatua. Biak jubilatuta, "jubilotekan" ari dira iraganaz eta enpresako esperientziez hizketan"

Gai polita jarri zien Maialen eta Erikari, izan ere "maiteminduta bai baina pasioa galduta daude biak eta horrexen bila joan dira Lesakara parrandara. Elkarri baino gehiago begiratzen diote ingurukoei"

Ametsek bakarka gai-emaileak esandako hainbat zenbakiren inguruan kantatu zuen. Eneko, Maialen eta Amets telebistako lehiaketa batean murgildu ziren eta saioaren amaieran, Erika eta Eneko elkarlanean aritu ziren kantuan Habaneran. Eneko eta Erika bertso-saioaren aurretik dantzan aritu ziren dantzarien lekuan jarri zituen aurkezleak eta hartu zuten kritikarako tartea ere.

• 
•