Bertsoa Unibertsitatean 2014-07-11

Bertsolaritza gizartean eta gizartea bertsolaritzan

 "Bertsolaritza eta gaurko gizartea". Horixe izan da "Bertsoa Unibertsitatean" zikloa itxi duen ikastaroa. Xabier Aierdi, Jon Sarasua eta Miren Artetxe bertsolaritza gaurko gizartean kokatzen aritu dira, eta baita gaurko gizarteak bertsolaritzan daukan eragina azaltzen ere.

 Xabier Aierdik "gizarte hipermodernoan" kokatutako "jarduera hipermoderno" bezala definitu du bertsolaritza. Azaldu duenez, bertsolaritza etengabe aldatzen da, baina ez du entzuleekiko etenik sortu, eta hala den bitartean aurrera jarraitu ahal izango du. 1994 eta 2006eko Bertsozaletasunaren Ikerketa Soziologikoen emaitzetatik abiatuta, gaur egungo bertsozalearen profila osatu du.

 Jon Sarasua, berriz, bertsolaritza hizkuntza komunitatean, euskalgintzan eta herrigintzan txertatzen aritu da. Azaldu duenez, bertsolaritzaren mugimenduak mugimendu zabalago baten parte bezala ikusi izan du beti bere burua: euskalgintzaren parte. Etorkizunean, euskalgintza koiuntura "interesgarri" batean aurkituko dela esan du, dibergentzia politikoaren barruan "beregain" izaten asmatu beharko baitu, hau da, diskurtso politiko propio bat eraikitzen. Horretan, Bertsozale Elkartea erreferentzia izan daitekeelakoan dago. Horrez gain, gizarte ehuna aktibatzen jarraitu beharko da etorkizunean ere.

 Miren Artetxe, bukatzeko, Iparraldeko bertsolaritzaren sozializazioak hizkuntzaren erabileran daukan eragina aztertzen ari da gazteen bizipenetatik abiatuta. Ikerketa bukatzeko urte eta erdi falta zaion arren, ikusi duenaren arabera bertso-eskolak gogoeta-gune ere badira, eta gazteen identitatearen osaketan zeresana izan dezakete. Honek hizkuntza hautua euskarara bideratzen laguntzen du. 

• 
•