Agenda 2014-08-07

Gaur Gasteizen, Aian eta Getxon izango da bertsoez non gozatua

 Eguraldi ederra lagun, gaur ere izango da bertsoez non gozatua.

 Aian, urtero bezala, jaialdia egingo da probalekuan gaueko 22:00etan. Sebastian Lizaso, Maialen Lujanbio, Amets Arzallus, Iker Zubeldia, Beñat Gaztelumendi eta Andoni Egaña jardungo dira kantuan Amaia Agirre gai-jartzaile dutela.

 Gasteizen, berriz, festa-giroan murgilduta jarraitzen dute. Eguerdiko 13:30ean, egunero bezala, Aihotz Plazan izango da jaialdia. Gaurkoan, Maialen Kortabarria gai-jartzaile dela, Etxahun Lekue, Oihane Perea, Unai Iturriaga eta Ander Solozabal dira kantatzekoak.

 Ondoren, iluntzeko 21:00etan, bertso-saio musikatua egingo dute Arabako Bertsozale Elkartearen txosnan. Irati Anda, Ander Solozabal eta Julen Zulaika jardungo dira kantuan, Bittor Abasolok gidatuta.

 Azkenik, Getxoko Erromo auzoko txosna gunean iluntzeko 20:30ean izango da bertso-saioa Arkaitz Estiballes, Jon Maia, Peio Arondo eta Eneritz Zabaletarekin. Nahikari Ayo izango dute gai-jartzaile.

• 
•