Euskal Jaiak Donostian 2014-09-10

Udari agur esan ezinean

Jendetza bildu zen, Donostiako Konstituzio Plazan, edo Plaza Berrian. Aulki guztiak beteta eta jendea inguruan zutik gau giro ederraz eta bertsolarien kantuaz gozatzen. Euskal Jaien egitarauaren baitan antolatutako saioan, Amaia Agirrek egin zuen sei bertsolarien gidaritza-lana.


Saio polita izan zen, gorabeheratsua behar bada, baina entzuleak asko eskertu zituen momentu gustagarri askorekin. Saioan zehar gai eta ariketa-mota ezberdinak tartekatzea proposatu zuen Agirre gai-jartzaileak. Orain gai umoretsua, gero serioa, pisuzkoak zein arinak tartekatuz. Bertso onak denetan joan ziren, baina osotasunean publikoak gehien eskertu zituenak umoretik iritsi zitzaizkionak izan ziren.

Doinu bizietan hirunaka zein launaka kantatutakoak: Igor Elortza, Sebastian Lizaso, Jon Maia eta Alaia Martin piraguatan sartzeko unean, eta batez ere udako ajea pasatzeko Sebastian Lizaso, Unai Agirre eta Jon Maia, Maialen Lujanbioren gimnasioan. Lan ederra egin zuen Maialenek beste hirurei aldiko erantzuten. Sebastian Lizaso Turismo-bulegoko langilearen larruan jarrita, besteen eskaerak erantzun behar izan zituen eta bertsoaldi horrek ere eragin zituen algara franko

Azpimarratzekoak zenbait bakarkako lan ere: Unai Agirrek erantzundako puntuak sagardoaren gaia ardatz zutela, Alaia Martinek habanera doinuan osatutako bertsoak gai-jartzaileak botatako oinak josiz… Ariketa hau oso gustagarri egin zitzaion entzuleari. Teknikoki oso deigarria eta erakargarria da, eta are gehiago Alaiak bertsoak josi eta bete zituen bezala .Jendearen txalo zaparrada jaso zaparra jaso zuen Alaiak. Igor Elortzak bakarkakoan alabari kantatutakoak ere iritsi ziren publikoaren barruraino.

Udako jaialdi gustagarria beraz irailaren lehen asteburuan Sagardo Egunaren amaieran eta Estropadetako lehen jardunaldiaren bezperan egindakoa.

• 
•