Katukale irakurle taldeak antolatuta 2014-09-30

Getariako bertsoaldi onenak

Katukale irakurle taldeak antolatuta bertso jaialdi edera egin zen ostiralean Getarian. Amets Arzallus, Miren Amuriza, Beñat Gaztelumendi eta Onintza Enbeita aritu ziren bertsotan, Uxue Alberdik gaiak jarrita. 200 laguneko aretoa ia beteta, borobil joan zen ekitaldia, eta halaxe igarri zen publikoaren erantzunean ere. Uxue Alberdik asmatu egin zuen saioaren planteamenduan eta gaietan eta bertsolariek ere mala berean erantzun zuten.

Zabal eta bertako
Eguneroko gerra txikietaz galdetu zien Alberdik lehenengo lanean lau bertsolariei: 'Gerra haundiak guda txikitan/ irabazi behar dira' borobildu zuen Gaztelumendik. Elkanoren errepresentazioaren gaia etorri zen gero. Getarian lau urtez behin egiten da Juan Sebastian Elkanok munduari itzulia eman eta porturatu zeneko errepresentazioa. Arzallus zen urteetan ardura hori izan duena eta orain semeari, Gaztelumendiri, lekukoa ematea pentsatu zuen... baina hark nahi ez... Amuriza eta Enbeita usainen sentsazioetan barrena jarri zituen Alberdik, memorian gehien irauten dutenak usainak omen direla adieraziz... Usain mota eta haien esanahai desberdinetan barrena aritu ziren. Arzallusek Tortura testigantzak izan zituen kantu gai bakarka, eta bertsoak ez ezik azpimarratzekoa da lehenengo bertsoan hartu zuen ikuspuntua. Amurizari Bizkaiko txapelketa irabazteko arrazoiak eskatu zizkion gai-jartzaileak. Enbeitak atzekoei kantatu zien, euren aurreko bizitzetan zer izan ziren azalduaz. Amuriza eta Gaztelumendi, bi ikasle nerabe, bertso-erdika aritu ziren zortzi puntuko Ternuako doinuan. Izan ziren bertako hitzen esanahiak asmatzea eta itsasoko ezagutza frogak jartzeko ariketak ere, entzuleak biziki eskertu zituenak. Muxutruk joan ziren bertsolariak Getariara, Alberdik saio hasieran adierazi zuenez, "ta diruz pagau ezin den/sentipen bat bat daramagu" bukatu zuen Enbeitak zazpi puntuko agurrean.

• 
•