Bizkaiko Bertsolari Txapelketa 2014-10-10

Galdakaon hasiko da sarea josten

 Igande honetan abiatuko da Bizkaiko Bertsolari Txapelketa. "Josi" lemari jarraiki, Bizkaiko eskualdeak, bertsolariak eta bertsozaleak jostea du helburu. Igandean Galdakaon jokatuko da lehenengo kanporaketa, arratsaldeko 17:30ean. Sei bertsolari aterako dira oholtzara:

 Aitor Bizkarra Ruiz
 Beñat Ugartetxea Ostolaza
 Garikoitz Sarriugarte Onaindia
 Ibon Ajuriagojeaskoa Garmendia
 Iñaki Iturriotz Zuluaga
 Julen Erezuma Arzanegi

 Aitor Bizkarra, Garikoitz Sarriugarte, Iñaki Iturriotz eta Julen Erezuma udaberriko eskualdeetako txapelketetatik sailkatu dira. Aitor Bizkarrak, gainera, lehenengo partehartzea du aurtengoa. Ibon Ajuriagojeaskoa eta Beñat Ugartetxea, berriz, orain sartuko dira txapelketan, aurretik Bizkaiko Bertsolari Txapelketako finalista izanak baitira. Saioko irabazlea zuzenean sailkatuko da finalaurrekoetara. Gainerakoek zain geratu beharko dute. Denera bost kanporaketa jokatuko dira, 30 bertsolarirekin, eta hemezortzik lortuko dute hurrengo fasera sailkatzea: euren saioak irabazi dituzten bostek eta puntuazioaren arabera sailkatutako hamahiruk.

 Egin beharreko lanak

 Bertsolariek hamarna bertso kantatu beharko dituzte: zortziko nagusian ofiziotan hiruna bertso; zortziko txikian ofiziotan beste hiruna; puntua emanda bi bertso zortziko txikian eta, bukatzeko, kartzelako lanean gai bati buruzko bi bertso doinu eta neurri librean.

 Sarrerak interneten eta bertan

 Sarrerak internet bidez eskuratu daitezke www.bertsosarrerak.eu atarian. Kanporaketetarako eta finalerako sarrerak erosi daitezke bertan. Bonoa erosteko aukera ere badago.

 Horrez gain, Galdakaon bertan sarrerak erosteko aukera izango da, Torrezabal aretoko txarteldegian, arratsaldeko 16:00etatik aurrera.

 Hurrengo saioa urriaren 19an jokatuko da Gautegiz-Arteagan. Aitor Arrutia, Inazio Vidal, Itxaso Paia, Josu Landeta, Lander Ibarluzea "Aitxulua" eta Oihana Bartra ariko dira bertan kantuan. Informazio gehiago dago kontsultagarri www.bertsozale.eus/bizkaikotxapelketa atarian.

• 
•