Atera txapelketa 2014-10-29

Gabiriarrak, urretxuarrak eta ormaiztegiarrak Goierriko herri arteko finalaurreeetan

Urretxuko bi taldek, Gabiriak eta Ormaiztegik jokatuko dituzte Goierriko herri arteko Atera txapelketako bi finalaurreak. Larunbatean, Segurako Elordi elkartean, Gabiria 2 eta Urretxu 1 arituko dira. Azaroaren 8an, Urretxuko Amalur, Ormaiztegi eta Urretxu 3. Irabazleek finala jokatuko dute azaroaren 14an Zaldibian. Bi saioak afalondoan izango dira.

Bertso gehiago orain
Finalaurreetan ere prestatutako agur bereziak mantendu egingo dira, baina, bertsolariek lan gehiago egingo dute fase honetan. Denek egingo dute zortziko handi, txiki eta kopletan, eta horretaz gain ariketa bereziak izango dituzte: habaneran, beste taldekoak oinak jarrita, publiko artean kopletan eta abar.

Larunbateko saioan sei bertsolari hauek arituko dira kantuan: Gabiriko taldetik Jokin Murua, Gorka Maiz eta Mikel Asurabarrena. Urretxuko taldetik Antton Fernandez, Amaia Iturrioz eta Asier Sasieta.

Lehen fasean saio jendetsuak eta giro ona
Gainezka ez baina saio jendetsuak izan dira lehen fasekoak. Prestatutako agurrek ikutu berezia ematen diote saioei, eta ariketetan ere maila oneko saioak joan dira. Hamaika taldek jokatu dute lehen fasea eta lau saio izan dira, hiru taldeko hiru eta bi taldeko bestea.

• 
•