Bizkaiko Bertsolari Txapelketa 2014-11-08

Igandean Zeanurin jokatuko da azkeneko kanporaketa

 Bukatzera doa Bizkaiko Bertsolari Txapelketako kanporaketa fasea. Igandean jokatuko da bosgarren eta azken saioa Zeanurin, arratsaldeko 17:30etatik aurrera, Ibarreta frontoian. Honako bertsolari hauek ariko dira bertan kantuan:

 Ander Elortegi Garatea
 Beñat Vidal Gurrutxaga
 Igor Menika Bengoetxea
 Imanol Uria Albizuri
 Joseba Barandiaran Andueza
 Xabat Galletebeitia Abaroa

 Seitik bi bertsolari eskualdeko txapeldun dira: Igor Menika Arratiakoa eta Imanol Uria Uribe Kostakoa. Gainerakoak puntuazioz sailkatu dira kanporaketetara. Saioan Zuriñe Iarritu Azpitarte ariko da aurkezle lanetan eta epaimahaian sei lagun jardungo dira: Ander Txakartegi Basterretxea, Andoni Larrea Garai, Iñaki Aurrekoetxea Arkotxa, Jurgi Fuentes Goikoetxea, Leire Etxeberria Gaztelu eta Mirari Azula Aurrekoetxea. Itziar Basterretxea Olarreaga izango da idazkari.

 Egin beharreko lana

 Bertsolariek hamarna bertso puntuagarri kantatuko dituzte, honako ariketa hauekin:

 -Ofiziotan, hiruna bertso zortziko handian
 -Ofiziotan, hiruna bertso zortziko txikian
 -Puntua emanda bina bertso zortziko txikian
 -Kartzelako lana: gai bati buruz bi bertso doinu eta neurri librean

 11 bertsolari sailkatuko dira finalaurrekoetara

 Behin igandeko saioa bukatuta, hamaika bertsolarik lortuko dute kanporaketetatik finalaurrekoetara sartzea: Bost kanporaketetako irabazleak zuzenean sailkatuko dira (Beñat Ugartetxea, Oihana Bartra, Eneko Abasolo "Abarkas" eta Gorka Ostolaza "Potxis") eta gainerako seirak puntuazioz. Momentuz, honako sei bertsolari hauek leudeke sailkatuta:

 1.- Joseba Artzak           372 puntu
 2.- Ibon Ajuriagojeaskoak   366 puntu
 3.- Julen Erezumak          356 puntu
 4.- Garikoitz Sarriugartek  354 puntu
 5.- Nerea Ibarzabalek       353 puntu
 6.- Peru Vidalek            344 puntu

 Horrez gain, orain dela bi urteko finaletik izena ematea erabaki duten zazpi bertsolariak ere finalaurrekoetan batuko dira lehiara. Honako hauek dira:

 Arkaitz Estiballes
 Etxahun Lekue
 Jone Uria
 Miren Amuriza
 Onintza Enbeita
 Fredi Paia
 Iratxe Ibarra

 Sarrerak salgai

 Zeanuriko saiorako, finalaurrekoetarako eta finalerako sarrerak internetez eskura daitezke www.bertsosarrerak.eu atarian. Txapelketa osorako bonoa ere eros daiteke bertan. Horrez gain, Zeanurin leihatilak zabalduko dira saioa hasi baino ordubete lehenago.

 Informazio gehiago nahi izanez gero egin klik hemen.

• 
•