Araba Bertsozale 2014-11-07

Araban bertsolaritza zabaltzeko ekimena

 Urteak dira Arabako Bertsozale Elkartea Araban bertsolaritza zabaltzeko lanean ari dela. Aurtengoan ekimen berri bat jarri du martxan: "Araba Bertsozale". Hiru argumentu daudela azaldu dute ekimena abiatzeko.

 Batetik, bertsolaritzak bestelako kultur eredu bat bultzatzeko aukera ematen duelako: "kontsumoko kultura indibidualaren aurrean kultura kolektiboa, sortzailea eta hartzailearen arteko harreman estua, zuzenekoa eta berezia".

 Bestetik, Araba orokorrean euskaldun berria delako, eta baita Arabako bertso mundua ere hein handi batean. Euskararen transmisio naturalean gertatutako eten horren ondorioz, entzule askok ez omen dakite askorik bertsolaritzaren inguruan. Hala, "oinarrizko ezagutza eta ulermen maila erraztu behar zaie euskararen ikaskuntza formala bideratzen ari direnei".

 Azkenik, Araban bertso-saioak antolatzeko ohitura falta dela ikusi dute. Horregatik, "akuilu lana" egiten jarraitu beharra ikusi dute txoko askotan.

 Hiru bidetako ekimena

 Hori ikusita jarri dute martxan "Araba Bertsozale" ekimena. Hiru zutabe izango ditu.

 Alde batetik, bertso-saio gutxi egiten diren herrietan bertsozaletzeko saioak egingo dituztel. Denera 14 dira programatutako saioak, besteak beste Langraizen, Argantzonen, Zalduondon, Amurrion, Murgian eta Korresen.

 Bestetik, Arabako zortzi eskualdeko eragilerekin harremanetan jarri dira. Kultura, euskara eta jaietan eragiten ari diren taldeak dira, eta horientzat bertsolaritzak izan ditzakeen aukerak ari dira aztertzen.

 Azkenik, bertso-eskolarik ez dagoen eskualdeetara ere zabaltzeko asmoa daukate. Horretarako, bertso-tailerrak egingo dituzte. Ruben Sanchez ariko da euskaltegiko taldeekin lanean. Gaur bertan Laudion izango da hitzaldia.

 Informazio gehiago nahi izanez gero egin klik hemen.

• 
•