Bertso-afaria Gabiriko Osinalde Elkartean 2014-12-04

Bizi-bizi afariaren bueltan

Pasa den ostiralean egin zuten bertso-afaria Gabiriko Osinalde Elkartean. Iker Zubeldia, Nerea Elustondo eta Julio Soto aritu ziren kantuan afaloste ederrean.

Apirila inguruan egiten den sariketagatik da ezaguna Osinalde. Osinalde Sariketa. Baina elkarte bat da Osinalde eta baditu bertsoarekin lotura gehiago. Afaria egin zuten gabiriarrek azaroaren azken ostiralean, eta gero kantuan jarri Iker Zubeldia, Julio Soto eta Nerea Elustondo.

Afaria ederra izan zen, "odolkie, zopea, eta haragie tomatekin". Bertsoetakoa ere ez zen atzean gelditu. Saio ona egin zuten eta primerako giroa zegoen.

Entzuleak (oso bertsozaleak) isil isilik kanturako garaian (megafoniarik gabe ari ziren) eta bukaeran txaloen eztanda. Bazuen sariketako eguneko antza horretan. Jende gutxixeago, 60 lagun inguru, ondo pasatzeko gogoz. Eta hala pasa ere.

Bertsolariek librean egin zuten lehen zatia, ordubete inguru. Afariari buruz hitz egin zuten, batez ere odolki-janaz eta elkarri adarra joz aritu ziren gehienetan. Umoretsu beti, zabarkeriaren marratik gertu batzuetan baina gustagarri orokorrean.

Zubeldiak txispa bat ateratzen zuen aldiro. Sua pizten jarraitzen Sotok (asko ezagutzen dira bi bertsolariok) eta Elustondok beharbada zenbaitetan deseroso eta errazkeriara jo nahi ezik, beti esana borobilduz eta bertsoa goitik behera ekarriz.

Bigarren zatian gaiak jarri zizkien Eresti Oiarbidek. Hirunaka gehienak, soinujoleen laguntzaz bakarren bat eta bakarkako bi ere bai.

Beharbada serioxeagoak zegoen girorako, baina ederki erantzunda utzi zituztenak. Askotan kantatu behar izan zaiona zuen Sotok (presoen sakabanaketa) eta ederki goxatu zuen neurri luzean. Elustondok aldiz gaia ohikoa izan arren, nondik kantatu behar zuena ez zen hain egunerokoa. Tratu txarrak zen gaia, baina Nerea bera zen bikotea jipoitzen zuena. Ez zirudien afari bateko girorako errazena (pentsatzeko ere tarte laburra hartu behar izaten da halakoetan) baina oso ondo ekarri zituen arrazoiak bertsotara.

Puntutan bizi eta umoretsu borobildu zuten Gabiriakoa hirurek. Esandakoa, ez zegoen Osinalden aparteko saririk, baina batzuen ateraldiak eta besteen txaloak gau ederra osatu zuten.