Lankuren eskutik, Gipuzkoako Foru aldundiaren babesarekin 2014-12-17

Bertsoa zaharren egoitzetara hurbiltzeko proiektua martxan

Bertsoa zaharren egoitzetan bizi diren pertsonengana hurbiltzeko proiektu interesgarria jarri du martxan Lankuk, Gipuzkoako Foru Aldundiaren laguntzarekin. Bertso ekitaldi hauen helburua, bertsoaz gozatu eta tarte atsegin bat igarotzeaz gain, adineko pertsonen gaitasun psikoemozionalak lantzea ere bada. Memoria, emozioak, buru lanketa... Ez da bertso saio arrunt bat; bertsoak eta solasaldia uztartzen dira, adinekoek bertsoarekin duten esperientzia, eurek bertso zaharrak kantatzea, ekitaldi bateko parte sentitzea... "Eskerrik asko gurekin gogoratu zaretelako" atera zitzaion barrutik ia ohiu eginez emakume bati, bertsolarien bisita estimatuaz.

Bat-batean eta bertso zaharrak kantatzen
Tertulia giroan ekin zioten Millan Telleriak eta Amia Agirrek Tolosan, 35-40 lagunen aurrean. Egoitzan bizi zirenak eta senitartekoren batzuk tartean, bisitan etorriak. Solasaldiak giroa sortuta, bertsotan ekin zioten bertsolariek, elkarri eta publikoari zirika. Atsedenaldian, adinekoek eurek ekin zioten kantatzeari, Iparragirreren bertso zaharrak buruz kantatuaz. Bertso, kantu eta kontu, ordu eta erdi inguruko egonaldi atsegina egin zuten Tolosako Iurramendi egoitzan.

2015ean jarraitzeko asmoz
Proiektuaren lehen fasean lau saio egin dira Gipuzkoan abenduan: Arrasaten, Tolosan, Bergaran eta azkena atzo Azpeitian. Esperientziak helburuak bete dituela ikusita, bai Lankuk eta bai Foru Aldundiak aurreratu dute proiektuarekin jarraitzeko asmotan direla.

• 
•