Arabako Bertsolari Txapelketa 2015-03-20

"Uste dut orain arte egindako lanaren jarraipen bat dela ni sartu izana"

 Legution "gustura" aritu zen Xabi Igoa finalaurrekoetako bere lehenengo saioan. Langraitzen, berriz, "lotuago" aritu zelakoan dago, finalera sartzeko presioak eta hamarreko handian esmatu ez izanak eraginda nagusiki.

 Lehendabiziko finala du aramaioarrak eta "pribilejiatu" bat sentitzen du bere burua Printzipal Antzokian kantatu ahal izateagatik. Gozatzera joango dela dio, baina presio puntu batekin: "erakutsi egin nahi dut zer egiteko gai naizen".

 Orain dela lau urte finalaren ateetan geratu zen, seigarrenarekin berdinduta. Aurten bera sartu izana "jarraipen" bat delakoan dago: "Orain dela lau urte Ander (Solozabal) sartu zen finalera, orain dela bi urte Jagoba (Apaolaza) eta aurten ni. Hirurok elkarrekin aritu izan gara bertso-eskolan, lagunak gara". Bere atzetik gelditutakoen artean asko dira bere belaunaldikoak, eta beraiekin egin den lanaren jarraipentzat du finalera sartu izana.

• 
•