Nafarroako Bertsolari Txapelketa 2015-03-26

"Bertsotan ahalik eta gusturen egiteko helburuarekin noa"

 Nafarroako bertsogintzan aurpegi ezagunenetakoa da Eneko Lazkozena. Urteak dira finaletan ari denetik, eta aurten bi saioak irabazita sartu da Elizondoko plaza handira. Hala ere, sentsazio kontrajarriak dauzka: "lehenengo saioan oso sentsazio ona izan nuen. Bigarrenean emaitzarekin pozik baina saioan zehar ez nintzen oso gustura aritu".

 Finalera zertara doan, beraz, garbi dauka: "bertsotan ahalik eta gusturen egiteko helburuarekin. Gutxienez lehenengo saioan adina gozatzeko helburuarekin. Sariren bat etorriko balitz izan dadila ongi kantatzearen eta gustura aritzearen ondorio; ez dut helburu hori jarri eta kostata ibiltzerik nahi".

 "Gustura aritzen naiz saioetan"

 Orain dela bi urteko Nafarroako Bertsolari Txapelketan "kolpea" jaso zuela dio: "Helburua nuen Euskal Herriko Txapelketan sartzea eta gutxigatik ez nuen lortu". Dena den, bertsotan gozatzen ari da: "Plaza asko ez ditut egiten baina egiten ditudanetan oso gustura aritzen naiz afari eta bestelakoetan".

• 
•