Nafarroako Bertsolari Txapelketa 2015-03-27

"Adi egon eta gaiei naizen lekutik erantzuten badiet gustura geratuko naiz"

Seigarren finala izango du Oskar Estangak larunbatean Elizondon jokatuko dena. Bertso-eskolan dabil fin-fin azken urtean: "Esateko dudana bertsotan abesteko teknika lantzen ari naiz". Gustura aritu da kantuan final-laurden eta finalaurrekoen fasean: "barne-dilema izaten dut, txapelketari erantzun edo neure buruari eta uste dut bietatik egin dudala bi saioetan".

Bertsokideak ere ondo ikusi ditu kantuan: "uste dut Nafarroako bertso-maila asko igo dela azken urteetan eta pozgarria da"

"Ohore bat da finalean kantatzea eta ez dut saioa bereziki konpetitiboa aurreikusten. Denok zerbait konpartitzea nahiko nuke" dio. Txapelari urrutitik begiratu arren uste du gai dela saio oso bat egiteko: "neure buruari adi egotea eskatzen diot eta gaiei ni naizen lekutik erantzuten badiet, gustura geratuko naiz" dio gaintzarrak.

• 
•