Denboraldiko azken saioa izango da igandekoa 2015-04-03

Bertsolaritza eta euskara Hitzetik Hortzeran

Bertso-Korrika egitasmoaren helburu nagusia euskara ikasten ari direnak bertsolaritzara gerturatzea da. Gainera askotan bertsolaritza bera izaten da herritarrak euskarara hurbiltzeko amua. Bertsoa eta euskara eskutik helduta doaz ezinbestean eta hori izango du mintzagai igandeko Hitzetik Hortzerak.

Hendaia eta Aguraingo Bertso-Korrika saioak eskainiko ditu telebista-programak. Hendaian Odei Barroso, Miren Artetxe eta Egoitz Zelaia aritu ziren kantuan; Agurainen berriz Xabi Paya, Oihane Perea, Onintza Enbeita eta Ruben Sanchez.

Saio horiez gain, Bergarako Erramu-zapatu bezperako saioko bertsoaldi onenak ere ikusi ahal izango dira. Han ziren kantuan Andoni Egaña, Uxue Alberdi, Iker Zubeldia, Oihana Bartra eta Unai Iturriaga, Iker Iriarte gai-jartzailearen gidaritzapean.

Denboraldiko azken Hitzetik Hortzera izango da igandekoa eta datorren udazkenean itzuliko da bertsoaren telebistako leihoa.

Azken saioa beraz, igandean 15:00etan ETB1en eta sarean EITB Nahieran atarian.

• 
•