Bertso-jaialdia izango da gauean 2015-05-06

Gai-jartzaile Eskolaren azken saioa larunbatean

Gai-jartzailearen jarduna izan dute gogoeta-gai urritik hona egin dituzten saioetan. Azkenekoa Amasa-Villabonan izango da larunbatean eta hilabete hauetan ikasitakoa praktikan jartzeko aukera izango dute ikasleek.

Izan ere, Gai-jartzaile Eskolari amaiera emateko bertso-saioa egingo dute Gurea aretoan. Kantuan izango dira Amets Arzallus, Maialen Lujanbio, Igor Elortza, Ane Labaka, Andoni Egaña eta Aitor Sarriegi eta gaiak ikastaroetan izan diren ikasleek jarriko dizkie.

Bertso-saiorako sarrerak
Bertso-jaialdia gaueko 22:30ean izango da Amasa-Villabonako Gurea aretoan eta sarrerak salgai daude bost euroren truke Amasa-Villabonan Subijana etxean (Bertsozale Elkartearen egoitzan), RK tabernan eta Amasa kafetegian, Anoetan Itzuli tabernan eta Tolosan Orbela tabernan. Saltzeko sarrerarik geratzen bada larunbatean saioa baino ordubete lehenago irekiko dute leihatila.

Bertsoaldi onenak Bertsoan
Datorren astean Bertsoan ikusgai izango dituzue jaialdiko bertsoaldi onenak.

Gai-jartzaile Eskola
Josu Goikoetxea eta Amaia Agirre aritu dira antolatzaile-lanetan eta Gai-jartzaile Eskola abiatu berritan azaldu zizkiguten ekimenaren nondik-norakoak eta helburu nagusiak.

• 
•