Maiatzaren 23an egingo dute bukaerako festa 2015-05-06

70 ikasle inguruk hartuko dute parte Arabako Eskolartekoan

 Abian da Arabako Eskolartekoa. Arabako 4 eskualdetako 8 herritako 9 bertso-eskoletako ikasleek parte hartuko dute aurtengoan, denera 70 bat ikaslek. Bi mailatan bereizita ariko dira: 14 urtetik beherakoak eta 14tik 18ra bitartekoak. Ahalik eta ikasle gehienek parte hartzeko aukera izan dezaten, idatziz eta bat-batean ariko dira. Bat-bateko saioetan, taldeka jardungo dira 14 urte artekoak eta, 14tik 18 urte artekoak, berriz, banaka. Legutio, Aramaio, Laudio, Murgia, Armentia, Gasteiz, Zalduondo, Agurain eta Kanpezuko bertso-eskoletako gazte eta haurrak izango dira aurtengoan.

 Lehiarik gabe haurren sailean

 14 urtetik beherakoak elkarren arteko lehiarik gabe ariko dira aurtengoan, saioek topaketa formatua izango baitute. Hala, talde bakoitzak prestatutako sorta kantatzeaz gain ariketa batzuetan bat-batean aritzeko aukera izango dute. Eta inguruko bertso-eskoletako kideak ere ezagutuko dituzte.

 Hiru kanporaketa gazteen sailean

 Gazteak, berriz, Gasteizen, Zalduondon eta Aramaion ariko dira bat-bateko saioetan. Kanporaketa hauetatik, 6 bertsolari sailkatuko dira maiatzaren 23an Kanpezun egingo den finalera. Dena den, finaletik harago joango da Kanpezuko festa, egun osoko egitaraua prestatu baitute antolatzaileek. Goizean haurren topaketa egingo dute, eta sortak kantatzeko aukera ere izango dute. Gazteen finalaren ondoren, berriz, bazkari herrikoia eta dantza plaza izango dituzte JOTAFA# txarangaren eskutik.

 Partaideengan eragin nahi duen ekimena

 Eskolartekoaren bidez, haur eta gazteak bertsolaritzaren inguruan rol ezberdinetan zailtzea dute helburu antolatzaileek. Horrez gain, adinkideak eta bertsolariak ezagutzen dituzte. Era honetan, bertsotan egiteko motibazioa piztu nahi zaie gazteei, eta baita inguru bat osatzea ere.
 

• 
•