Egun osoko festa izango da Orion 2015-05-21

Ekainaren 27an ospatuko da Euskal Herriko Eskolarteko finala

 Aurrera doaz herrialdeetako Eskolartekoak eta jada prest dago Euskal Herriko Eskolarteko finaleko egitaraua. Aurten ere Orion izango da, ekainaren 27an, eta antolatzaileek egun osoko egitaraua prestatu dute.

 Goizeko 11:00etan hasiko da festa, 15 eta 18 urte bitarteko gazteen finalarekin. Aurtengoan Maialen Lujanbiok aurkeztuko du saioa, eta Sustrai Colinak jantziko dio txapela txapeldunari.

 Ondoren, bazkaria egingo da plazan. Aurten ere bertako produktu ekologikoekin prestatuko dute bazkaria, Euskal Herriko Nekazaritza eta Ekoizle Ekologikoen Kontseiluarekin elkarlanea. Bazkaritarako sarrerak eta kamisetak salgai daude www.bertsosarrerak.eus atarian.

 Arratsaldean bertsoak eta musika

 Bazkalostean ere izango da zer entzuna. Hasteko, Maialen Lujanbiok eta Sustrai Colinak libreko bertso-saioa osatuko dute. Eta, ondoren, bi emanaldi izango dira. Lehendabizi Keshala taldea ariko da. Eskolartekotik pasatutako Malen Amenabar, Kattalin Barcena, Leire Amenabar eta Arrate Gaztelu dira taldeko kide.

 Bukatzeko, Bi Bala taldeak ere bere kontzertua egingo du. Taldean, besteak beste, Aitzol Barandiaran eta Iñaki Gurrutxagak hartzen dute parte, eta Eskolartekoan kantatuak dira biak.

 Herrialdeetatik autobusak

 Bestalde, aurten Oriora joateko autobusak antolatzeko asmoa dago. Herrialdeetako Bertsozale Elkarteak arduratuko dira autobusak jartzeaz. Iformazio gehiago nahi izanez gero egin klik hemen.

• 
•