Larunbatean hil zen Kanbon 2015-06-01

Emile Larre, bertso-jartzaile eta euskaltzalea

Emile Larre bertso-jartzailea hil da asteburu honetan. Baigorrin jaio zen 1926an eta 25 urterekin egin zen apaiz. Bikario, irakasle-lanetan, erretore... ibili izan da eta Batikano II.Kontzilioko Elizaren berritze-mugimenduan liturugia euskaratzeko eragileetako bat izan zen.

Euskaltzalea izan zen batik bat Larre, Herria astekariko zuzendari eta editorialista izan da, eta Euskaltzaindiako Ahozko Literatura batzordeko kidea. Euskaltzain oso izendatu zuten 1975ean.

Bertso-eragiletzan ere lan-handia egin zuen, bertso-irakaslea izan zen eta bertsolari askoren plazaratzean eragin zuen; besteak beste, Beskoitzeko Larre, Jean Baptiste Irigarai arrosatarra, Etxeberri oztibarretarra, Merkapide jutsiarra.

Transmisioan ez ezik,  sustatzaile ere ibili zen eta hainbat bertso-saio antolatu zituen: esaterako, Urruñako saioa berak antolatu zuen 1958tik 1962ra. Saio horietan gai-jartzaile lanak ere egin zituen.

2012ko Xiberua, Lapurdi eta Baxenabarreko Bertsulari Xapelketan txapela jantzi zion Amets Arzallus txapeldunari.

89 urterekin hil da Emile Larre bertso-jartzailea Kanbon.

• 
•