Plazatik Gaztetxera sariketa 2015-06-02

Finaleko zortzikotea erabakita

Pasa den ostiralean Deban jokatu zen Plazatik Gaztetxera sariketako bigarren eta azken finalaurrekoa. Bertso-bikote hauek izan ziren kantuan bertan: Ander Zulaika eta Josune Arakistain, Manex Astigarraga eta Maddi Sarasua, Maialen Akizu eta Jon Gurrutxuga, eta Aitor Irastorza eta Aitor Salegi. Lan bikaina egin zuten zortzi bertsolariek  eta azkenean, Aitor Irastorza eta Aitor Salegik lortu zuten lehen postua eta finaleko txartela.

Ostegunean Bertsoan ikusgai izango dira Debako bertsoaldi onenak.

Finaleko lau bertso-bikoteak
Antzuolako finalaurrekoan Eli Pagola eta Eñaut Martikorena sailkatu ziren finalera eta puntuazioaren arabera, Aratz Igartzabal eta Gorka Maiz, eta Mikel Iturriotz eta Amaia Iturriotz izango dira finalean.

Finala Plazatik Gaztetxera Egunean Markina Xemeinen
Finala ekainaren 13an Markina-Xemeinen izango da Plazatik Gaztetxera Egunean. Antolatzaileek diotenez, "bertso-finalari merezi duen arreta eskainiz, egunpasa egiteko moduko egitaraua prestatu da".

Hauxe da egitaraua:
11.30 Juntadizoa
12.00 Bertso-poteoa, kanporaketetan entzulearen saria lortu duten bertsolariekin.
14.30 Bazkaria gaztetxean. (bazkariko txartelak txapelketa antolatu duten herrietako gaztetxeetan daude salgai)
Bazkalostean, mahai-jolasak.
19.00 Bertso finala.

Saioaren ostean erromerian jarraituko du jaiak.

• 
•