Egun osoko egitarauarekin 2015-06-04

Bizkaiko Bertso Eskolen Eguna ospatuko da larunbatean Igorren

 Herrialdez herrialde, bertso-eskoletako gazte eta gaztetxoak beren urteroko egunak ospatzen ari dira Euskal Herri osoan. Larunbatean Bizkaiko Bertso Eskolen Eguna ospatuko da Igorreko Kiñu gaztetxean. Egun osoko egitaraua prestatu dute antolatzaileek.Hasteko, goizeko 10:00etan, bertso idatzien finala jokatuko da.

 Zortzi bertsolari bat-batean

 Idatzizko finalaren ondoren, 11:30ean, bat-bateko finala egingo dute. Aurtengoan 32 gaztetxok hartu dute parte bat-batean. Maiatzaren 18an hasi eta 22ra bitartean jokatu dira kanporaketak eta honako zortzikote hau sailkatu da finalera:

 Iker Garitagaitia Astigarraga
 Igor Galartza Intxausti
 Lur Ziarrusta Intxaurtza
 Lurdes Ondaro Mallea
 Paule Loizaga Legarra
 Peio Azkarate Elejabarrieta
 Txaber Altube Sarrionandia
 Unai Mendiburu Valor

 Larunbatean, finalaz gain, ekainaren 27an Orion jokatuko den Euskal Herriko Eskolartekora ze bi bertsolari sailkatzen diren ere erabakiko da.

 Arratsaldean festa

 Behin bat-bateko eta idatzizko sariak banatuta, eguerdiko 14:30ak aldera egingo dute bazkaria. Bazkalostean, bertso-eskola bakoitzak prestatu duen emanaldia egiteko tartea izango du. Eguna erromeria batekin borobilduko dute.

• 
•