Kantu Inprobisatuaren Nazioarteko Jardunaldiak 2015-09-30

Maialen Lujanbio: "Berezia da gure kontestutik kanpo bertsotan egitea"

Gustora itzuli dira Leongo jardunaldietatik bertsolari, gai-jartzaile eta Mintzola Fundazioko kideak. Cerezales del Condadon eta Leongo hiriburuan egin dituzten mahai-inguru eta kantu-emanaldietan jende askok parte hartu baitu.

Kanariar Uharteetako, Galiziako eta Euskal Herriko kantu inprobisatzaileak elkartu dira "Europa bat-batean. Territorio Archivo Activación 11: Itinerarios de la cultura oral" izeneko jardunaldietan eta Maialen Lujanbiok dioenez "berezia da gure kontestutik kanpo bertsotan egitea".

Maialen Lujanbio eta Ane Labaka bertsolariak aritu dira kantuan inprobisatzaile kanariar eta galiziarrekin, eta Itxaso Paiak jarri zituen gaiak larunbateko emanaldian. Berak aitortu digunez "galiziarrak eta kanariarrak beldurtuta zeuden hasieran, beraiek gairik gabe inprobisatzeko ohitura baitute".

Fundación Cerezales Antonio y Ciniak, Fundación Sierra Pambleyk, Donostia 2016, Europako Kultur Hiriburuak eta Mintzola Fundazioak elkarlanean antolatu dituzte asteburuko jardunaldiak Europa bat-batean egitasmoaren baitan. Udazkeneko bigarren hitzordua Bartzelonan izango da azaroaren 6tik 8ra.

Bideoa honetan bildu ditugu jardunaldiei buruz Maialen Lujanbio, Ane Labaka eta Itxaso Paiak kontatu dizkiguten iritzi eta sentipenak.

• 
•