Julio Soto eta Fernando Anbustegiren emanaldia 2015-10-21

Bertsoak ipuinen trukean

Fernando Anbustegi ipuin-kontalaria herriz herri, tokian tokiko pertsonaia batekin elkartuko da eta elkarrizketa baten bidez, bere ipuinetarako istorio berriak bilduko ditu. Ipuin horiek kontatuko ditu emanaldian. Julio Soto bertsolariak, ipuin kontalariak momentuan agindutako pertsonaiaren larrutik kantatuko du bere barrua bertsoz erakutsiz. Pertsonaia emanaldiro aldatuko dute.

Horixe da "Istorio Trukea(n)", bertsoak ipuinen truk eta ipuinak bertsoen truk: batek ipuinak eskainiko ditu eta besteak ordainetan hortik abiatutako bizipenak, istorioak, bertsoz kontatuko ditu.

Plazan askotan elkartu dira Fernando Anbustegi eta Julio Soto, bat bertsotarako gaiak jartzen eta bestea bertsotan. Orain, emanaldi berezi honetarako elkartu dira Lankuren bitartez. 

Emankizunaren estrenaldia ostiral honetan, hilak 23,  Donostiako Casares Kultur etxean izango da arratsaldeko 19:30ean.

Hurrengo emanaldiak
Urriaren 31an, Ondarroako Literatur Amuak zikloan izango dira Kofradia Zaharrean 12:30ean. Intxaurrondoko Larrotxenea kultur etxean azaroaren 25ean arratseko 19:00etan eta Durangon, Ahotsenean abenduaren 5ean 11:30ean.

• 
•