Gipuzkoako Bertsolari Txapelketa 2015-11-18

Igandean hasiko dira Gipuzkoako finalaurrekoak Zarautzen

Astebeteko atsedenaren ondotik, Gipuzkoako Txapelketak finalaurreko faseari ekingo dio igandeann Zarautzen, Aritzbatalde kiroldegian. Oholtzan, sei bertsolari, Agin Laburu, Ander Lizarralde, Alaia Martin, Beñat Iguaran, Jon Martin eta Unai Gaztelumendi.  Saioko irabazlea finalera sartuko da zuzenean. Saioa 17:30etan. Sarrerak: www.bertsosarrerak.eus gunean.

Egin beharreko lanak
Bertsolariek 15 bertso puntuagarri kantatuko dituzte finalaurrekoetan. Orain arteko neurriekin alderatuta, 10ko handia da berezitasuna. Lanen ordena ere ez da ohikoa, zortziko txikia laugarren ariketa izango baita, kartzela aurretik.

    •    Binaka, gaia emanda, hamarreko handian, hiruna bertso.
    •    Bakarka, lehen puntua emanda, zortziko txikian hiruna bertso.
    •    Binaka, gaia emanda, 6 puntuko motzean hiruna bertso
    •    Binaka, gaia emanda, zortziko txikian, hiruna bertso.
    •    Kartzela: bakarka, gaia emanda, nahi den doinu eta neurrian, hiruna bertso.


Beste bi finalaurrekoak

Tolosan, azaroaren 29an
Beñat Gaztelumendi, Unai Agirre, Iñaki Apalategi, Nerea Elustondo, Beñat Lizaso eta Oihana Iguaran.

Eibarren, abenduaren 6an
Nahikari Gabilondo, Iñaki Gurrutxaga, Felix Zubia, Arkaitz Oiartzabal Xamoa, Jon Maia eta Mikel Artola.

Euskal Herriko txapelketarako txartela
Gipuzkoako Txapelketatik 17 lehenbizikoek izango dute Txapelketa Nagusian kantatzeko aukera. Hamasei herrialdeari dagozkionak dira eta Beñat Gaztelumendik, Euskal Herriko finalista izaki, jada eskura du txartel hori.

ETBn igandean laburpena eta Bertsoan astelehenean hautaketa zabala
ETBk igande gauean 40 minutuko laburpena emango du Herri Txiki programaren ondotik, 23:00etan. Bertsoa sareko plazak astelehenean hautaketa zabala eskainiko du eta asteartean bertsolarien balorazioak.

• 
•