Urtarrilaren 30ean izango da Donostiako Kursaalen 2015-12-23

Salgai daude Bertso Egunerako sarrerak

Dagoeneko salgai daude Bertso Egunerako sarrerak www.bertsosarrerak.eus atarian. Urtarrilaren 6a arte bazkideek izango dute afarirako sarrerak erosteko lehentasuna eta bazkide ez den batentzat eta 16 urtetik beherako beste batentzat sarrera bana erosi ahal izango du. Hortik aurrera, gainontzeko bertsozaleek ere eskuratu ahal izango dituzte gauerako sarrerak. Arratsaldeko ekitaldirako sarrerak bazkideek zein bazkide ez direnek erosi ditzakete dagoeneko.

Bertso Eguna urtarrilaren 30ean izango da Donostiako Kursaalen. Ohi bezala goizez, arratsaldez eta gauez izango dira ekitaldiak eta afaria Kursaalen egingo da, lehen egiten zen bezala.

Gaueko afaria eta bertsoak Kursaalen bertan
Esan bezala, afarian geratzen diren bertsozaleek ez dute Kursaaletik mugitu beharko, bertan izango baita gaueko ekitaldia. Afaritarako menua hauxe izango da: entsalada, txanpiñoiak, bakailua ajoarriero erara, arrain zopa, arkume errea patata purearekin eta arroz esnea. Edariak, txotxa eta kafea barne.

Afalosteko menua berriz, hauek osatuko dute: Amets Arzallus, Unai Mendizabal, Xabi Igoa, Onintza Enbeita, Alaia Martin, Eli Pagola, Maddalen Arzallus, Eneritz Artetxe, Iker Zubeldia, Jexux Mari Irazu, Unai Agirre eta Alaitz Rekondok. Bapateko bertsoak eta bertso-jarriak izango dira, tartean musikatuak ere bai.

Bertsozale Elkarteak urtarrilean emango ditu goizeko eta arratsaldeko ekitaldiei buruzko xehetasunak.

• 
•