Egun osoko egitaraua prestatu dute Donostiarako 2016-01-27

Dena prest larunbateko Bertso Egunerako

Horrelako egunetan ohikoa den moduan, "urduri" dago Bertso Egunaren atarian Jon Agirresarobe, Bertsozale Elkarteko Sustapen eragilea. Gauza asko lotu behar izaten dituzte egun osoko egitaraua osatzeko baina "ia dena prest" dagoela esan digu.

Aldaketekin hasiko da aurtengo Bertso Eguna. Urtarrilean kalean izan ohi den eguraldi txarretik ihesi "giro goxoa bilatu" dute Kursaal pareko Picachilla tabernan. Bertso-saio musikatua egingo dute han. "Ez dute musikatuta kantatuko, baizik eta gai-jartzaileek izango dute musikarien laguntza. Doakoa izango da eta ea zer moduz ateratzen den" dio Jon Agirresarobek.

Erabakien ingurukoa izango da Kursaaleko arratsaldeko ekitaldia. Jon Agirresarobek azaldu digunez, "bertsolariek antolatzaileen deia jasotzen dutenetik oholtzan kantatzen duten arte hartu behar izaten dituzten erabakiak" izango dira bertsotarako gai. Hamar bertsolari arituko dira kantuan eta 2zio taldeak ere zuzenean joko du oholtzan. Bi abesti eskainiko dituzte Odei Barroso eta bere kideek: "azken diskako abesti bat eta bestea, egunerako eta gaiari lotuta propio sortu dutena".

"Gaueko saioaren aldaketa nagusia kokapenari dagokio. Azken bi urteetan eman ez diren baldintzak eman dira aurten eta Kursaaleko jatetxera itzuliko da afaria". Bat-batekoak bertsoak eta bertso-jarriak egongo dira afalostean.

Oraindik geratzen dira sarrerak
Jon Agirresarobek esan digunez, "afaltzera etorri nahi duenak lehenbailen erosi beharko du sarrera, gutxi batzuk geratzen baitira saltzeko". Sarrerak www.bertsosarrerak.eus atarian daude salgai eta larunbatean 16:00etan irekiko dute Kursaaleko leihatila.

• 
•