Bardoak taldekako txapelketa 2016-02-22

Obario Maldikoak taldearentzat lehen puntua

Barañain eta Berriozarko "Hiru Garagardo eta pintxo bat" eta Iruñeko "Obario Maldikoak" taldeek eman diote hasiera Bardoak taldekako txapelketako bigarren faseari. Ostiralean izan zen saioa Barañainen eta han aritu ziren kantuan Sarai Robles, Mikel Lasarte eta Ainara Ieregi lehen taldetik eta Saioa Alkaiza, Irati Majuelo eta Aimar Karrika bigarrenetik.

Antolatzaileen balorazioaren arabera, "hasierako agurretan txotxongiloak, bertsoak eta musika uztartu zituzten eta hainbat ariketa berri planteatuta (Habaneran zein Juana Bixenta doinuan taldekideen artean, Segidillan…), publikoarekin konektatzea lortu zuten bertsolariek. Oso saio umoretsua osatu zuen seikoteak eta aurkezle lanetan gainera Barañaingo gaztetxoen bertso-eskolako kideak izanik, harreman berezia sortu zen bertsozaleekin".

Lehen puntua Iruñeara
Ostiraleko saioan "Obario Maldikoak" taldeak irabazi zuen jokoan zegoen puntua eta martxoaren 4an egingo duten saioan erabakiko da bi taldeetatik zein izango den finalean.

Asteazkenean ikusgai izango dituzue saioko bertsoaldi onenak.

• 
•