Larunbatean Argantzunen izan zen azkeneko saioa 2016-03-14

Festa giroan bukatu da Arabako Bertso-Kuadrilla Artekoa

 Arabako sei eskualdetan sei topaketa egin ondoren, joan zen larunbatean Argantzunen bukatu zen aurtengo Arabako Bertso-Kuadrilla Artekoa. Egun osoko festa izan zen Argantzunen, eta topaketetan aritutako 14 taldeetako ordezkariek kantatu zuten. Aurtengoan ez da txapeldunik izan, ahalik eta partehartze zabalena lortzea baitzen helburua.

 Eguerdian poteoa

 50 lagun elkartu ziren eguerditik bertsotan aritzeko prest. Ahalik eta formatu desberdinenetako saioak izan ziren larunbatean, ahalik eta jende gehienak kanta zezan. Eguerdian tabernaz taberna aritu ziren kantuan eta, tartean, herriko umeek sorta bat kantatu zuten herriko plazan.

 Behin eguerdiko saioak bukatuta, 90 lagun elkartu ziren Argantzungo pilotalekuan bazkaltzeko prest.

 Bazkalostea bi formatutan

 Bazkalostean bi formatutako saioak izan ziren. Hasteko, bertso-saio musikatua eskaini zuten Arabako sei eskualdetako sei ordezkarik. Ondoren, bertso-guda formatuan aritu ziren kantuan.

 Jai giroan bukatu zen festa

 Behin bazkalosteko saioak bukatuta, musikak ere protagonismo handia izan zuen. "Orkresta" elektrotxarangarekin herriuan barrena ibili ondoren, bertso-ragga emanaldia izan zen herriko taberna batean.
 

• 
•