Hurrengo ostiralean jokatuko da lehen kanporaketa 2016-04-08

Berrikuntzak aurtengo Plazatik Gaztetxera sariketan

Bertsoa gazteengana eta gazteak bertsolaritzara hurbiltzea dira Plazatik Gaztetxera sariketaren helburu nagusiak. Aurten 15.edizioa egingo da eta hainbat berrikuntzekin dator. Antolatzaileen arabera,  "Plazatik Gaztetxera txapelketa eredu berriak martxan jartzeko gune gisara ikusten dugunez, eredu formal lehiakorraren planteamendua alde batera laga nahi izaten dugu. Horregatik, epaitzeko sisteman berrikuntzak sartuko ditugu; bertso bakoitzari epaile talde batek puntuazio jakin bat eman beharrean, publikoko talde aukeratu batek (5-7 pertsonez osatua) gehien iritsi den edo transmititu duen bikotea aukeratuko du, matematiketan sartu barik".

Baina ez dira hor amaitzen aldaketak, "ariketa berriak ere sartuko ditugu, saioari bizitasuna eta umorea eman asmoz. Txapelketetan ohikoak ez diren ariketak sartuz, inguru edo klima erosoago bat sortzea da helburua (bai bertsolari zein entzuleentzat)".

32 bertsolari eta 7 saio
Ohi bezala, lau kanporaketa, bi finalerdi eta finala izango ditu aurtengo Plazatik Gaztetxera sariketak. Saio guztiak gaztetxeetan izango dira eta aurten, bi herri berritako gazte asanbladek hartuko dute parte, Bergarakoak eta Ondarrukoak.

Bertsolariek bikoteka hartuko dute parte, 16 bertso-bikote osatuz. Finalerdietara lau bertso-bikote sailkatuko dira eta finalean bi izango dira.Saio guztiak gaueko 22:30ean hasiko dira eta saio aurretik gaztetxean bertan afaltzeko aukera izango da.

Finala maiatzaren 21ean izango da, Mutrikun egingo den Plazatik Gaztetxera Egunean.

Saioetako bertsoaldi onenak BERTSOAN
Plazatik Gaztetxera sariketako antolatzaileekin elkarlanean arituko da BERTSOA eta saioetako informazioaz gain, bertsoaldi onenak ere ikusgai izango dituzue gure atarian.

Plazatik Gaztetxera sariketa: egin beharreko lanak
Plazatik Gaztetxera sariketa: saioen egutegia

• 
•