Plazatik Gaztetxera sariketa 2016-05-02

Maider Arregi eta Gemma Urteaga, eta Manex Astigarraga eta Maddi Sarasua lehen finalistak

Manex Astigarraga eta Maddi Sarasua, Josune Arakistain eta Ander Zulaika,  Gemma Urteaga eta Maider Arregi, eta Aitor Irastorza eta Koldo Gezuraga aritu ziren kantuan pasa den larunbatean Debako gaztetxean, Plazatik Gaztetxera sariketaren lehen finalaurrekoan.

Antolatzaileen esanetan, "agur bereziekin hasi zuten saioa bertsolariek; doinu klasikoagoekin bateria, gitarrak, reggaetoia, dantzarako doinuak eta bestelakoak entzun ahal izan ziren bertan. Ondoren ariketekin hasi ziren protagonistak". Horietako batzuk azpimarratzekotan, "Gemma Urteaga eta Manex Astigarragaren saioak barre algara asko eragin zituen, gaueko une alaienetakoa burutuz. Ander Zulaikaren puntu-erantzunak izan ziren deigarrienak, erantzun azkar eta zorrotzak". Eta Maider Arregiren bakarkako lana.  "Arraunlari gazte baten paperean jarri zuten, non entrenatzaileak doping-a praktikatzera bultzatzen zuen, eta bi bertso ederrekin eman zion saioari amaiera, praktika horren aurka azalduz."

Bukaeran, aditu-taldearen eta publikoaren botoak batuta, Gemma Urteaga eta Maider Arregi, eta Manex Astigarraga eta Maddi Sarasua sailkatu ziren finalera.

Bigarren finalaurrekoa datorren larunbatean Markina-Xemeinen
Datorren larunbatean Markina-Xemeingo gaztetxean izango da Plazatik Gaztetxera sariketaren bigarren eta azken finalaurrekoa. Han izango dira kantuan bertso-bikote hauek:
-Eli Pagola eta Iñigo Zubiaurre "Beitxi"
-Eñaut Martikorena eta  Imanol Lekunberri "Txilin"
-Asier Galarza eta Aratz Igartzabal
-Aitor Salegi eta Antton Aizpurua

• 
•