Nafarroako bertso-eskolen eguna 2016-05-13

Nafarroako gazteen bertso-eskolen eguna igandean Amaiurren

Urtero bezala, ikasturte amaierarekin batera Nafarroako gazteen Bertso Eskolek beren eguna ospatuko dute. Maiatzaren 15ean Amaiurren egingo den festa honek, 10-16 urte bitarteko ikasleak bilduko ditu, goiz eta arratsaldeko egitarau baten bueltan.
11:30ean hasita, ezagutza jolasekin ongi etorria gauzatuko da. Ondoren, Mikel Altzuarten eskutik, Amaiurko monolitora bisita gidatua eginen dute gaztetxoek eta segidan, goizeko tarteari amaiera emateko, Amaiurko eskolan Nafarroako Bertsopaper Lehiaketako sari banaketa ekitaldia egingo da. Arratsaldean berriz, bat-bateko saiotxo bat antolatuko da ikasleekin eta bertsogintzarekin lotutako jolasek itxiko dute egitaraua.
Klaseko jarduna osatzeko helburuarekin eta ikasleen elkar-ezagutza handitzeko xedez egiten den ekimena da honakoa.

Nafarroan 228 ikasle, eskola orduz kanpo
Gaur egun,18 urtetik beherako 228 ikaslek lantzen dute bertsolaritza eskola orduz kanpo. Astean behingo maiztasunez, bertsogintzaren oinarriak eta irakaspenak jasotzearekin batera, ahozkotasuna eta gaitasun komunikatiboak garatzen dituzte besteak beste, transmisio bide den giro ludiko batean.

• 
•