Bizkaiko eskolartekoa eta bertso-eskolen eguna igandean Getxon

Bizkaiko bertso-eskolen egunaren baitan, igande honetan, maiatzaren 22an jokatuko da Bizkaiko Eskolartekoa Getxon, Fadura kiroldegian. Goizean, 10:00etan, idatzizko txapelketa egingo da lehenengo. Bizkaia osotik joango dira gazteak Getxora. Horren ostean, 11:30ean, bat-bateko finala jokatuko da. Orain arte lau kanporaketa jokatu dira, eta hortik sailkatu dira gazteak finalera.

2016ko finalistak, hauek:

• Aritz Landeta (ALBE)
• Beñat Bilbao (Lilibertso Bertso Eskola)
• Bittor Altube (Durangoko Bertso Eskola)
• Eneko Barruetabeña (Durangoko Bertso Eskola)
• Gorka Pagonabarraga (Durangoko Bertso Eskola)
• Iruri Altzerreka (Berrizko Bertso Eskola)
• Txaber Altube (Durangoko Bertso Eskola)
• Unai Mendiburu (ALBE)

Eskolarteko bat-bateko finalean Olatz Larrinaga Caballero arituko da gai emaile beharretan. Epaimahaia, ostera, Alaitz Etxanobe Bereziartuak, Beñat Romero Maguregik eta Joseba Santxo Uriartek osatuko dute. Eskolarteko idatzizko eta bat-batekoak jokatu ostean, sari banaketa ekitaldia egingo da. Gero, bazkaria egongo da.

Arratsaldean, bazkalostean bertso-eskolen tartea izango da eta ondoren Bizkaiko Bertsolari Txapelketaren Udabarriko Faseko kanporaketa jokatuko da, Faduran bertan.