Agenda 2016-09-01

Dozena bat bertso-ekitaldi izango dira asteburuan

 Bertso-saio ugari izango dira iraileko lehenengo asteburuan ere. Uda bukatzear den arren, oraindik festa giroan dabiltza zenbait herritan eta festetako egitarauan bertsoak bere lekua izango du.

 Gaur bertan Plentzian saioa izango da arratsaldeko 18:30ean Astillero plazan. Amets Arzallus, Igor Elortza, Maialen Lujanbio eta Jon Maia jardungo dira kantuan. Erlantz Ibargurengoitia izango dute gai-jartzaile.

 Hiru saio bihar

 Biharko beste hiru saio daude iragarrita. Berriozarren, jaietako egitarauaren baitan, saioa eta poteoa izango dira arratsaldeko 17:30ean hasita, Kirol Tabernan. Saioa Alkaiza eta Sustrai Colina dira bertan kantatzekoak.

 Elgoibarko San Antolin auzoan ere bertso-afaria egingo dute iluntzeko 21:00etan karpan, festak ospatzen ari baitira. Iker Zubeldia eta Julio Soto dira bertan kantatzekoak.

 Zarautzen, berriz, Lizardi Sariko finala jokatuko da gaueko 22:00etatik aurrera Modelo aretoan. Maialen Akizu, Aratz Igartzabal "Potto", Unai Mendizabal, Eli Pagola, Aitor Salegi eta Aitor Servier ariko dira kantuan.

 Larunbatean Donostian eta Etxalekun

 Larunbaterako beste hiru saio daude agendan. Donostian, Euskal Jaiak direla eta, urteroko bi saio izango dira. Goizean, Sagardo dastaketan, Amets Arzallus eta Sebastian Lizaso ariko dira bertsotan 11:45ean Konstituzio plazan. Gauean, berriz, 22:30ean, urteroko jaialdia izango da plazan bertan. Andoni Egaña, Igor Elortza, Oihana Iguaran, Jexux Mari Irazu, Maialen Lujanbio eta Jon Maia ariko dira kantuan Karlos Aizpurua gai-jartzaile dutela.

 Etxalekun, berriz, bertso-bazkaria egingo dute plazan eguerdiko 14:00etan Julio Soto eta Iker Zubeldiarekin.

 Bost saio igandean

 Azkenik, igandean beste bost saio izango dira. Beasainen Usurbe mendian aritzekoak dira Andoni Egaña eta Mikel Mendizabal goizean eta eguerdian.

 Berriatuan, Miloiko jaiak direla eta, bertso-saioa izango da eguerdian Uxue Alberdi eta Alaia Martinekin.

 Izurtzan, berriz, jaietako saioa egingo da eguerdian Santa Ageda baselizaren inguruan. Txaber Altube, Iratxe Ibarra eta Erika Lagoma ariko dira bertsotan.

 Donostian Abuztock ekitaldia izango da Gladys Enea parkean arratsaldeko 18:00etan. Amets Arzallus bertan izango da.

 Bukatzeko, Ordiziako Euskal Jaietan ere bertsolariak ariko dira bazkaritan Beti-Alai pilotalekuan. Goierriko Bertso-Eskolako kideak ariko dira bertan.

• 
•