Euskadi Literatura sariak 2016-10-13

Uxue Alberdik Euskadi Saria jaso du koplatan idatzitako 'Besarkada' lanagatik

Uxue Alberdik Euskadi Literatura Saria irabazi du, haur literaturaren atalean, Besarkadak lanagatik. Kopla bidez idatzitako lana da eta hori ere nabarmendu du epaimahaiak.
"Azal eta mami biltzen du besarkada batek sortarazten duen zirrara", Alberdiren hitzetan. Kopla bidez osatu du liburua idazle eta bertsolariak, eta hori ere nabarmendu du epaimahaiak. "Pentsatzeko baino 'sentitzeko' liburu baten aurrean gaude". Izan ere, handia da liburuan sentsazioei ematen zeien pisua. "Txikitasunaren handitasunari gorazarre egiten dio eta agerian uzten du literaturaren oinarrizko balio sotila: zu, ni, hitzak, irudiak eta guztiak biltzeko une bat".

Besarkada liburuko ilustrazioak egin dituen Maite Gurrutxaga izan du gogoan Alberdik prentsaurrekoan egindako hitz hartzean. "Bere irudirik gabe ez dut uste sari hau emango zidatenik". Azaldu duenez, gainera, garrantzitsua izan da elkarlan hori. "Koplak orain lau urte idatzi nituen, eta kajoian ezkutatuta izan ditut luzez". Gurrutxagari bidali zizkion orduan, eta hala sortu zen proiektua. Kanta bat ere egin zuten kopla horien harira, eta baita Gurrutxagaren irudiekin sortutako animazio bat ere. Aurkezpenean zuzenean kantatu ditu liburua osatzen duten koplak, Mikel Laboaren Sorterriko koplak doinuan.

• 
•