Asteburu honetan egingo dute topaketa 2016-11-03

Nafarroa eta Xilabako bertso-eskoletako gazteak Donezteben

Asteburu honetan Nafarroa, Xiberoa, Lapurdi eta Baxenabarreko 26 bertsolari gazte elkartuko dira Doneztebeko Belbieretxea aterpetxean. 14 eta 17 urte artean dituzte eta horietatik 15 Nafarroako bertso-eskoletako kideak dira; beste 11 Xiberoa, Lapurdi eta Baxenabarrekoak.

Nafarroako Kirola eta Gazteriaren Institutuak, Nafarroako Bertsozale Elkartearekin elkarlanean, lehenengo aldiz antolatu du ekimen hau. Izan ere, Nafarroako Gobernuak topagune artistiko eta kulturalak sortu nahi ditu gazteriaren alorrean aurrera eraman nahi dituen estrategien baitan.

Larunbat eta igandean bertsolaritzarekin eta ahozko inprobisazioarekin lotutako hainbat ekintza egingo dituzte gazteek: hip-hop tailerra, Julio Soto eta Sustrai Colinaren bertso-saioa, jolas didaktiko eta tailerrak... Topaketan parte hartuko duten gazteen emanaldi batekin amaituko da asteburu-pasa.

• 
•