Hitzetik Hortzera 2016-11-04

Xilabaren errepasoa Hitzetik Hortzeran

 Xiberoa, Lapurdi eta Baxenabarreko Bertsulari Xapelketara begira jarriko da Hitzetik Hortzera. Azaroaren 12an jokatuko da finala Baionako Lauga Gelan, eta honako seikote hau ariko da bertan kantuan:

 Sustrai Colina
 Amets Arzallus
 Odei Barroso
 Miren Artetxe
 Maddalen Arzallus
 Xumai Murua

 Finalisten iritziak

 Aste honetako Hitzetik Hortzeran sei finalistei egindako elkarrizketak izango dira ikusgai, eta txapelketan orain arte egindakoa aztertzeaz gain finalera begira dituzten sentsazioen berri ere emango dute.

 Aiziritze eta Larresoroko bertsoaldiak

 Urriaren 22an eta 29an jokatu ziren finalaurrekoetako bigarren itzuliko saioak. Amets Arzallus, Maddalen Arzallus, Miren Artetxe, Nahia Sasco, Maddi Sarasua eta Egoitz Zelaia aritu ziren Aiziritzen eta Sustrai Colina, Odei Barroso, Eneritz Zabaleta, Xumai Murua, Aitor Servier eta Ramuntxo Christy Larresoron. Bi saioetako bertsoaldi onenak eskainiko ditu aste honetako Hitzetik Hortzerak.

 Mattin Trekuren historikoa

 Mattin Treku (1916-1981) bertsolari ahetzearra omenduko dute aurtengo Xiberoa, Lapurdi eta Baxenabarreko Bertsulari Xapelketan eta bere seme Panpili Trekuk jantziko dio txapela txapeldunari. Bertsolari maitatua izan zen Mattin, eta umorerako joera berezia bazuen ere, une hunkigarriak ere izan zituen oholtzan. Behin, bertso-saio batean atzerrian zuen semeari hiru bertso kantatu eta negarra irten zitzaion. Laguna hala ikusita, bertso-sorta bat idatzi zion Fernando Aire Xalbador (1920-1976) urepeldarrak. Pasarte hura gogoratuko du aste honetako programak.

 Igandean ikusgai
    
 Hori dena eta askoz gehiago igande honetan izango da ikusgai ETB1en, arratsaldeko 15:00etatik aurrera. Eta laster interneten EITB Nahieran-en.

• 
•