Ostiralean jokatu zen finala Elizondon 2016-11-21

Joanes Illarregi txapeldun Mariano Izeta sariketan

VII.Mariano Izeta sariketaren finala jokatu zen ostiralean Elizondoko Kortarixar jatetxean. Afalostean eta tripak ondo beteta egin zuten saioa Joanes Illarregik, Alazne Untxalok, Iker Gorosterrazuk eta Patxi Castillok. Azkenean, puntu gehien lortuta, Joanes Illarregi leitzarrak jantzi zuen txapela.

Fernando Anbustegi jarri zizkien gaiak eta epaile-lanetan aritu ziren Saioa Mitxelena, Jon Abril eta Izaro Mitxelena. Mariano Izeta zenaren alabak jantzi zion txapela txapeldunari han elkartutako 60 lagunen aurrean.

Mariano Izeta gogoan
Sariketa hau bi urtez behin antolatzen du Nafarroako Bertsozale Elkarteak, Baztango Udalaren laguntzarekin. Nafarroako bertsolari gazte eta hasiberriak ezagutaraztea da helburu nagusia eta bide batez, Mariano Izeta baztandarrak bertsolaritzaren alde egindako lana omentzea.

Zazpigarren aldiz antolatu dute aurten beraz, zazpigarren txapelduna da Joanes Illarregi. Bere aurretik bertsolari hauek irabazi dute Mariano Izeta sariketa: Jon Barberena, Oier Lakuntza, Jon Elizetxe, Iñaki Aleman, Aimar Karrika eta Saioa Alkaizak.

• 
•