Hitzetik Hortzera 2016-11-25

Oier Sanjurjo elkarrizketatuko dute igandeko Hitzetik Hortzeran

 Oier Sanjurjo izango da igandeko Hitzetik Hortzerako elkarrizketatua. Bertsozalea da Osasuna taldeko kapitaina eta, igandeko programan, bere ibilbideaz eta bertsolaritzak eta futbolak dituzten antzekotasunez ariko da.

 Epailea eta futbolaria historikoan

 Futbola bertso-gai bilakatuko da aste honetako Historikoan ere. 2001ean futbolariaren eta epailearen paperetik aritu ziren Arkaitz Goikoetxea eta Fredi Paia Donibane Garazin. Txapelketa Nagusiko saioa zen, eta umoretik aritu ziren zortziko txikian elkarri zirika. Bertsoaldi hori berreskuratuko du igandeko programak.

 Iruñea, Ermua eta Arrasateko bertsoaldiak

 Dena den, gaurkotasunak ere izango du lekurik aste honetako programan. Iruñean Bertsoaroa zikloko azkeneko bertso-saioan izan ziren Hitzetik Hortzerako kamerak. Tartean, Nafarroako, EAEko eta Euskal Elkargoko lehendakarien arteko bilera antolatu nahian aritu ziren Julio Soto, Beñat Gaztelumendi eta Amets Arzallus; futbolzalearen eta tabernariaren paperetik jardun ziren Julio Soto eta Agin Laburu; Xalbadorri kantatu zion Amets Arzallusek bakarka eta bertsotan egingo zuen robota sortzeko lanetan aritu ziren Julio Soto eta Beñat Gaztelumendi. Bertsoaldi horiek entzungai izango dira igande honetako programan.

 Eta Ermua eta Arrasateko bertsoaldiak ere ekarriko dituzte pantailara: gorputzeko atal bana hautatzen arituko dira Andoni Egaña, Nerea Ibarzabal, Alaia Martin, Amets Arzallus, Uxue Alberdi eta Unai Iturriaga; etxeko lanen inguruan ikuspegi desberdinak dituzten bi irakasleren larrutik jardun ziren Alaia Martin eta Andoni Egaña eta zahar-etxe batean sartuko dira Oihana Bartra eta Maider Arregi.

 Igandean ikusgai
 
 Hori dena eta askoz gehiago igande honetan izango da ikusgai ETB1en, arratsaldeko 15:00etatik aurrera. Eta laster interneten ere bai EITB Nahieran-en.

• 
•