Hitzetik Hortzera 2017-02-03

Arantxa Iturbe elkarrizketatuko du Hitzetik Hortzerak

 Elkarrizketatzaile trebatua da Arantxa Iturbe. Umetatik idazle izateko bokazioa bazuen ere, urte asko daramatza Euskadi Irratiko mikrofonoetan esatari lanetan. Kulturaren inguruko saioetan aritu izan da bereziki, eta gaur egun "Arratsean" saioa gidatzen du. Bera izango da aste honetako Hitzetik Hortzerako gonbidatua, eta irratigintzaz eta bertsolaritzaz jardungo da.

 Arantxa Iturbe gai-jartzaile
 
 Historikoen atalean ere Arantxa Iturbe izango da protagonista. 1994ko maiatzean bertso jaialdia izan zen Donostiako Victoria Eugenia antzoki dotorean. Tartean, teloiaren atzealdetik gai-jartzaile lanetan aritu zen Arantxa Iturbe. Sebastian Lizasok eta Anjel Mari Peñagarikanok kantatu zioten berak jarritako gaiari.

 Atariaren alde Tolosan

 Tolosaldeko Atariaren estudioetan egingo diote Arantxa Iturberi elkarrizketa. Urtero-urtero Atariaren aldeko bertso jaialdi jendetsua egiten da Tolosan, Leidor Antzokian. Urtarrilaren 21ean izan zen aurtengo saioa eta Igor Elortza, Iker Zubeldia, Amets Arzallus, Oihana Iguaran, Sustrai Colina eta Andoni Egaña jardun ziren kantuan Amaia Agirre gidari zutela. Saioko bertsoaldi onenak eskainiko ditu aste honetako programak.

 Sansebastianetako bertso-saioa Donostian

 Biharamunean, Sansebastianetako bertso jaialdia egin zen Donostiako Antzoki Zaharrean. Unai Iturriaga, Igor Elortza, Miren Amuriza, Sustrai Colina, Nerea Elustondo eta Beñat Gaztelumendi jardun ziren bertsotan, eta Saroi Jauregik jarri zizkien gaiak. Saio honetako alerik onenak ere igandeko programan izango dira ikusgai.

 Igandean ikusgai
   
 Hori dena eta askoz gehiago igande honetan izango da ikusgai ETB1en, arratsaldeko 15:00etatik aurrera. Eta laster interneten ere bai, EITB Nahieran-en.
 

• 
•