Hitzetik Hortzera 2017-02-24

Hernani eta Iturengo gutiziak Hitzetik Hortzeran

 Sukaldaritzak eta bertsolaritzak harreman estua izan dute urte luzeetan. Horren lekuko izango da igande honetako Hitzetik Hortzera. Sukaldea gai bilakatutako bi saio izango dira programaren ardatz.

 Kontu Eguna Iturenen

 Ezagunak dira Iturengo Inauteriak. Azkeneko egunean, Kontu Egunean alegia, bazkaria egin ohi da herriko ganbaran, asteko kontuak egin eta festak merezi bezala borobiltzeko. Urtero-urtero bertsolariak aritu ohi dira bazkalostean kantuan, eta aurten ere Amets Arzallus eta Iker Zubeldiak kantatu dute, urtero bezala giro beroan. Saioko bertsoaldi onenak bilduko ditu igandeko programak.

 Horrez gain, saiorako bazkaria prestatzen aritu ziren Kristina Juankorena eta Marijose Apeztegia elkarrizketatuko ditu beren lanaren berri jakin eta Iturenek eta bertsoak duten harreman bero horren nondik norakoak gertutik ezagutzeko.

 Gutiziak Basque Culinary Center-en
    
 Aste honetako bigarren saioa Basque Culinary Center-en grabatua izango da. Otsailaren 17an Maialen Lujanbio, Andoni Egaña, Iker Zubeldia eta Unai Agirre aritu ziren bertan kantuan, Aitor Mendiluze gidari zutela. Sukaldaritza gai hartuta aritu ziren kantuan, eta saio umoretsua osatu zuten.

 Gaur egungo sukaldaritza modernoaren berri gertuagotik ezagutzeko Juan Mari Arzaken sukaldera ere joango da Hitzetik Hortzera bisitan, eta bertsolaritzarekin duen harremanaren berri ere emango du.

 Igandean ikusgai
   
 Hori dena eta askoz gehiago igande honetan izango da ikusgai ETB1en, arratsaldeko 15:00etatik aurrera. Eta laster interneten ere bai, EITB Nahieran-en.

• 
•