Bertsolari Txapelketa Nagusiak 2017-06-16

Andoni Egaña eta Unai Iturriaga soinekoa aukeratzen

1993an lehenengoz jantzi zuen txapela Andoni Egañak. Urte hartan, estrainekoz finalera sailkatu zen Unai Iturriagarekin binaka aritu zen zarauztarra, saio umoretsu batean.

 Bertsolari Txapelketa Nagusia badatorrela eta, irailera bitarte orain arteko txapelketetako bertsoaldi historikoak berreskuratzen ari da Bertsoa.eus. Gaurkoan 1993ko finaleko bertsoaldi bat ekarri dugu.

 Jendetza Donostiako Belodromoan

 Donostiako Belodromoan jokatu zen hirugarren finala izan zen 1993ko abenduaren 19koa. Bertsolaritza "boom"-aren garaian zegoen bete-betean: telebistarako jauzia emana zuen, eta hamarkada bat lehenago finaletako oholtzarako jauzia emandako bertsolari belaunaldiak hartua zuen plazako lekukoa. Poliki-poliki bertsoa esparru berrietara sartzen ari zen.

 1993ko final hartan ordura arte inoiz sartutako jendetza handiena sartu omen zen Belodromoan. Oholtza ere ohikoa ez zen lekuan jarri zen: ertz batean. Hala, harmaila zabalenak ezker-eskuin geratzen ziren eta "pelouse"-an aulkiak luze.

 Andoni Egañaren lehenengo txapela

 Finalean lehendik ere aritutako bost bertsolari aritu ziren: Andoni Egaña, Xabier Euzkitze, Sebastian Lizaso, Jon Enbeita eta Anjel Mari Peñagarikano. Eta bost horiekin batera, bertsolari belaunaldi berri bateko lehenengo ahotsak: Aritz Lopategi, Jokin Sorozabal eta artean 19 urte baino ez zituen Unai Iturriaga. Durangarra beste bost aldiz sailkatuko zen gerora finalera.

 1993an Andoni Egañak lehenengoz irabazi zuen Bertsolari Txapelketa Nagusiko txapela. Urte hartako apirilean hil zen Lazkao Txikiri kantatu zion bukaerako agurra.

 Andoni Egaña eta Unai Iturriaga soinekoa aukeratzen

 Final hartatik Unai Iturriagak eta Andoni Egañak osatutako bertsoaldi bat ekarri dugu gaurko. "Iparragirre abila dela" doinuan aritu ziren kantuan. Bi neska lagunen larrutik kantatu zuten: etxe oneko mutil batekin zita zeukan Unaik, eta soinekoa eskatu zion Andoni lagunari. Bertsoaldi umoretsua osatu zuten.

Albiste gehiago

Jone Larrinaga Dañobeitia - Bertsolari Bertsozale Podkasta 2024-03-28

«Bertsolaritzaren garapena aberatsagoa da espektatibarik gabe»

Mikel Artola Izagirre - Gipuzkoako Bertsozale Elkarteko koordinatzailea 2024-03-26

«Gipuzkoan 10-50 urte bitarteko bertsolari ia denek kantatuko dute udaberrian»

Juanjo Uria Zubiarrain - Bertsolari bertsozale podkasta 2024-03-15

Juanjo Uria: bertsoa eragiletzatik eta pasiotik bizi duen hernaniarra

Araitz Katarain, Izaro Bilbao eta Janire Arrizabalaga - elkarrizketa 2024-03-13

«Bertso munduratze prozesu horretan sortzen diren gatazkak gorpuztuko ditugu, mimoz, arduraz eta umorez»

Larunbat gauean 21:00etan ETB1en 2024-03-07

Hitzetik Hortzera Xabier Rico Arabako txapel emailearekin