Jon Azpillaga omenduko dute Xalbador Egunean, Urepelen

Egitarauari begira, larunbaterako kontzertua iragarri dute Urepeleko elizan. Euskal kantuak eta musika klasikoa, Estitxu Sistiaga (pianoa), Nikole Baqueriza (ahotsa) eta Mikel Urdangari biolin-jolearen eskutik. Ondotik, afari alaitua.

Igandean, goizeko 9:00etan ohiko ibilaldia izango da, Xalbadorren etxola eta Urepele herria ezagutzeko. Gero, meza eta 11:15ean Joxe Mari Iriondo kazetari eta ohorezko euskaltzainaren hitzaldia iragarri dute, Urepeleko eskolan emango dena; hitzaldi honetan Jon Azpillaga bertsolariaren bizitza aletuko du Iriondok, modu arin eta didaktikoan.Goizean, Bilboko Salbatzaile dantza taldea eta herri kirolak ere izango dira.

Bertso jaialdia bazkalostean
Xalbador Egunaz bertso jaialdia izaten da urtero bazkalostean, frontoian. Aurtengoan Amets Arzallus, Xebastian Lizaso, Juan Joxe Eizmendi "Loidesaletxe II" eta Jose Luis Gorrotxategi arituko dira. Aurtengo Xalbadorren Eguna erromeria batekin itxiko da.