Bertsoaroa 2017-11-22

Bertso jaialdia ostegunean Iruñean

Bertsoaroak beste bertso jaialdi ederra eskainiko du ostegun honetan Iruñean, aurtengo edizioko hirugarrena: Amets Arzallus, Igor Elortza, Julio Soto, Alaia Martin, Xabi Maia eta Saioa Alkaiza arituko dira kantuan eta Maider Ansa gai-jartzaile lanetan. Gurutzeko Plazako Institutuko Areto Nagusian, 20:00etan.

Ostegunekoarekin, Bertsoaroak dagoeneko sei ekitaldi eskaini ditu azaroan eta beste bi gehiago eskainiko ditu heldu den astean. Asteartean, azaroaren 28an, 'Bi bala' emanaldia izango da, Aitzol Barandiaran eta Iñaki Gurrutxagak gidatutako proiektua bertso jarriak eta musika uztartuta. Terminal tabernan izango da, 20:00etan.

Txapelketa Nagusiko azken finalaurrekoa, abenduaren 2an
Bertsoaroak ekitaldi berezia izango du aurtengo edizioa amaitzeko: Bertsolari Txapelketa Nagusiko azken finalaurrekoa: Aitor Mendiluze, Oihana Iguaran, Alaia Martin, Miren Amuriza, Unai Agirre eta Aitor Sarriegi. Saio hau jokatuta erabakiko da finaleko zortzikotea. Anaitasuna kiroldegian izango da, 17:00etan hasita.