Bost eskualdeetan 2018-02-28

Bizkaiko Eskualdeetako Txapelketa abian

Busturialdean abiatu da Bizkaiko Eskualdeetako Txapelketa. Bi urtez behin jokatzen da eta azken bi edizioetan izaera berria izan du. Urte luzetan, Eskuadeetakoa Bizkaiko Txapelketako sailkapen fase gisa baliatu izan da baina, duela bi urte sailkapen faseak izaera propioa hartu zuen eta Bizkaia osoko bertsolariak zaku berean sartuta egiten da orain.

Zeregin horretatik libre, eskualde gehienek erabaki dute Eskualdeko Txapelketarekin jarraitzea ekimenak inguruan sortzen duen dinamikagatik. Halaxe egin dute aurten ere Busturialdean, Enkarterrietan, Uribe Kostan, Uribe Butroen eta Arratian. Eskualde bakoitzak bere neurriko txapelketa antolatzen du, modu autonomoan: Busturialdean hiru kanporaketa eta finala izango dira, Gernikan, martxoaren 17an. Enkarterrietan, egun bakarrean egingo dute dena, larunbat honetan hain zuzen: goizean kanporaketak eta arratsaldean finala. Uribe Kostan, sei kanporaketa eta finala egingo dituzte, martxoaren 24an. Arratian eta Uribe Butroen egun bakarrean jokatuko da ekitaldia. Durangaldean, Lea Artibain eta Hego Uriben ez da txapelketarik izango, funtzio hori betetzen duten beste ekimen batzuk badirelako. (Argazkia: Lilibertso bertso eskola)