Gazte sariketak 2018-05-02

Plazatik Gaztetxerako finalistak erabakita

Plazatik Gaztetxera txapelketako bi finalaurrekoak jokatu ziren joan den asteburuan eta erabakita gelditu da Ondarroan kantatuko duen seikotea. Eibarren jokatu zen lehen saioa ostiralean, gaztetxean, afalondoan: Ander Zulaika, Oier Etxeberria, Mikel Iturriotz, Urko Arregi, Ane Peñagarikano eta Jokin Bergara aritu ziren kantuan, Manu Goioganak aurkeztuta. Epaimahaiak Jokin Bergara, Oier Etxeberria eta Urko Arregi jo zituen finalerako.

Hurrengo egunean, larunbatean, Deban izan zen bigarren finalaurrekoa: Manex Astigarraga, Aitor Zubikarai, Ane Beloki, Oihana Arana, Odei Irigoien eta Antton Aizpurua aritu ziren kantuan, Lander Aranberrik aurkeztuta. Gaztetxea txiki gelditu zen. Manex Astigarragak, Aitor Zubikaraik eta Ane Belokik lortu zuten finalerako txartela. 

Finala Ondarroan
Lau kanporaketa eta bi finalaurreko jokatuta, Ondarroan jokatuko da Plazatik Gaztetxerako finala maiatzaren 12an, 18:00etan: Jokin Bergara, Oier Etxeberria, Urko Arregi, Manex Astigarraga, Aitor Zubikarai eta Ane Beloki arituko dira kantuan. Txapelketan 24 bertsolarik hartu dute parte, eta publiko aldetik gaztetxetan, orohar, oso harrera beroa izan du.